श्याम घिमिरे चैत ६ अर्घाखाँची –
राष्ट्रिय आर्थिक गणना २०८२ सम्बन्धी छलफल तथा अन्तरक्रिया कार्यक्रम सुक्रवार सन्धिखर्कमा सम्पन्न भएको छ । सन्धिखर्क नगरपालिकाको सभाहलमा आयोजित कार्यक्रममा स्थानीय तह, सरकारी कार्यालय, निजी क्षेत्र तथा सरोकारवाला निकायका प्रतिनिधिहरूको सहभागिता रहेको थियो ।

कार्यक्रमको उद्घाटन गर्दै जिल्ला समन्वय समिति अर्घाखाँचीका प्रमुख जीवनारायण कोइरालाले राष्ट्रिय आर्थिक गणना २०८२ लाई सफल बनाउन सबै सरोकारवाला निकायबीच समन्वय र सहकार्य आवश्यक रहेको उल्लेख गर्नुभयो । उहाँले यथार्थपरक तथ्यांक संकलनमार्फत जिल्लाको समग्र आर्थिक अवस्था पहिचान गर्न मद्दत पुग्ने बताउँदै विकास योजना निर्माणमा यसले महत्वपूर्ण भूमिका खेल्ने विश्वास व्यक्त पनि गर्नुभयो ।

सन्धिखर्क नगरपालिका प्रमुख कृष्ण प्रसाद श्रेष्ठले यथार्थपरक तथ्यांक, विकास योजना र नीति निर्माणका लागि महत्वपूर्ण हुने भन्दै सत्य तथ्य तथ्यांक उपलब्ध गराउन सबैलाइ आग्रह गर्नुभयो ।

कार्यक्रममा आर्थीक गणना कार्यालय अर्घाखाँचीका प्रमुख बाबुराम न्यौपानेले आर्थिक गणनाको महत्व, कार्यान्वयन प्रक्रिया तथा अपेक्षित उपलब्धिको बारेमा सहजीकरण गर्नुभएको थियो । न्यौपानेले आर्थीक गणना सफल कार्यान्वयनका लागि सबैको सहयोग र सहकार्य आवश्यक रहेकोमा जोड दिनुभयो ।

कार्यक्रममा नेपाल पत्रकार महासंघ अर्घाखाँचीका अध्यक्ष गणेश खनालले प्रभावकारी सूचना प्रवाह र जनविश्वास बढाउन सञ्चार क्षेत्रको भूमिका महत्वपूर्ण रहने बताउनुभयो ।

कार्यक्रम प्रमुख जिल्ला अधिकारी तोयनारायण सुवेदीको अध्यक्षता र आर्थिक गणना कार्यालयका सहायक आर्थिक गणना अधिकारी दिलिप केसिको सञ्चालनमा सम्पन्न भएको हो । कार्यक्रममा आर्थिक गणनाको महत्व, तथ्यांक संकलन प्रक्रिया र यसको उपयोगिताबारे छलफल गरिएको थियो । कार्यालयले २०८३ को असार मसन्ता सम्म कामगर्ने बताइएको छ ।