पुस १९- अर्घाखाँँचीको शितगंगा नगरपालिका १० बहखोरकी राधा थापा सधैँ झैँ आइतवार बिहान पनि बिहानै उठेर दूध लिन जानुभयो । बिहानै उठेर नजिकैको डुम्रीपाटा गाउँमा दूध लिन जाने उहाँको दैनिकी थियो ।

बहखोरमा होटल व्यवसाय गर्दै आउनुभएकी थापा होटलमा आएका पाहुना तथा ग्राहकलाई चिया खुवाउन भनेर दूध लिन आइतवार बिहान पनि जानुभयो । तर ६० वर्षीय थापा बिहान ९ बजेसम्म पनि दूध लिएर आउनुभएन । दुध लिएर नआएपछि किन ढिला भयो भनेर आफन्तले फोन गरे । दूध लिन जाने ठाउँमा उहाँ नगएको भन्ने थाहा पाएपछि स्थानीयवासी र आफन्तले खोजी गर्न थाले ।

खोजी गर्दै जाँदा नजिकैको खोल्सीमा थापा मृत अवस्थामा भेटिनुभयो । स्थानीयवासीले तत्काल प्रहरीलाई खबर गरे । प्रहरी आएर घटना हेर्दा हत्या भएको हुन सक्ने आशङ्का गरेपछि प्रहरी र स्थानीयवासीले हत्याराको खोजी गर्न थाले । खोजी गर्दै जाँदा थापालाई हत्या गरी भागेका भारतीय नागरिक २३ वर्षीय सुशान्त सिंहलाई प्रहरीले पक्राउ ग¥यो ।

हत्या गरेर थापाले लगाएका गरगहना लुटेर भाग्दै गरेका भारतीय नागरिक सिंहलाई शितगंगा नगरपालिका ११ को मुन्द्रीबासको जङ्गलबाट प्रहरीले पक्राउ गर्न सफल भएको हो । हत्याराले थापाले कानमा लगाएका मडहरी, घाँटीमा लगाएका सिक्री लगायतका सुनका गरगहना लुटेर लगेका पाइयो ।

पक्राउ परेका सिंहले खोल्सीमा लुकेर बसी हँसिया र ढुङ्गाले हानेर थापाको हत्या गरेको प्रहरीसमक्ष स्वीकार गरेका छन् । उनलाई जिल्ला अदालत अर्घाखाँचीबाट सात दिनको म्याद थप गरी अनुसन्धान भरहेको जिल्ला प्रहरी कार्यालय अर्घाखाँचीका प्रहरी नायब उपरीक्षक मुकुन्दप्रसाद रिजालले बताउनुभयो । source:ujyaaloonline