नेत्र मरासिनी  माघ,१४ अर्घाखाँची
संस्कृति पर्यटन तथा नागरिक उड्यन राज्यमन्त्री सुशिला सिर्पालीले खेलको माध्यमबाट जिल्लालाई राष्ट्रिय तथा अन्तराष्ट्रिय रुपमा चिनाउन सहयोग पुग्ने बताउनुभएको छ । अर्घाखाँचीको सदरमुकाम सन्धिखर्कमा आज (आइतवार)बाट सुरु भएको १३ औं राष्ट्पति रनिङ शिल्ड प्रतियोगिताको उद्घाटन गर्दै मन्त्री सिर्पालीले यस्तो बताउनुभएको हो । खेलले मानिसको चौतर्फी विकासमा सहयोग गर्ने भएकाले राज्यले खेल क्षेत्रको विकासमा ध्यान दिनुपर्नेमा जोड दिनुभयो । अर्घाखाँचीमा खेलको विकास गर्न प्रशस्त सम्भावना रहेकोले खेल क्षेत्रको विकास गर्न सके खेल तथा पर्यटनमा समेत टेवा पुग्ने उहाँको भनाइ छ ।

खेलकुदले मानिसको शारीरिक,मानसिक तथा सामाजिक बिकास गर्दै देश तथा बिदेशमा चिनाउन महत्वपुर्ण भुमिका खेल्ने भएकाले खेलकुदमा लाग्न सबैलाई आग्रह समेत गर्नुभयो । सन्धिखर्कको टुडिखेलमा आजबाट सुरु भएको खेल यहि माघ १६ गतेसम्म चल्ने जिल्ला खेलकुद विकास समितीका अध्यक्ष बिष्णु क्षेत्रीले जानकारी दिनुभयो । जिल्लाका छ वटै पालिकाबाट बिभिन्न बिधामा खेलाडीको सहभागिता रहेको छ ।