२०८२ माघ ७ – लुम्बिनी प्रदेश सरकारले बसन्त पञ्चमी (श्रीपञ्चमी) का अवसरमा प्रदेशभर सार्वजनिक बिदा दिएको छ । प्रदेश सरकारको आन्तरिक मामिला तथा कानुन मन्त्रालयले सार्वजनिक सूचना जारी गर्दै वि.सं. २०८२ माघ ९ गते शुक्रबारका दिन सार्वजनिक बिदा हुने जानकारी दिएको हो । प्रदेश राजपत्र भाग ३, खण्ड ८, संख्या १४ मा प्रकाशित सूचनाअनुसार बसन्त पञ्चमीका अवसरमा प्रदेशका सबै सरकारी कार्यालय, सार्वजनिक संघ–संस्था तथा विद्यालयहरू बन्द रहनेछन् ।

प्रदेश सचिव लोक बहादुर सुनारद्वारा हस्ताक्षरित सूचनामा बसन्त पञ्चमीको सांस्कृतिक तथा धार्मिक महत्वलाई ध्यानमा राख्दै सार्वजनिक बिदा दिने निर्णय गरिएको उल्लेख छ । बसन्त पञ्चमीलाई विद्या, कला र संगीतकी देवी सरस्वतीको पूजा गर्ने पर्वका रूपमा मनाइन्छ । यस दिन विशेषगरी विद्यार्थीहरूले सरस्वती पूजा गरी अक्षरारम्भ गर्ने परम्परा रहेको छ ।