श्याम घिमिरे माघ २० सन्धिखर्क –

सन्धिखर्क नगरपालिका वडा नं. ७ स्थित गच्छे घाट हाल आधुनिक र व्यवस्थित रूपमा विकास हुँदै गएको छ । सन्धिखर्क नगरपालिका, लुम्बिनी प्रदेश सरकार तथा सम्बन्धित निकायहरूको सहकार्य र सहयोगमा निर्माण गरिएको यस घाटले धार्मिक, सांस्कृतिक तथा सामाजिक महत्वलाई थप मजबुत बनाएको छ ।

स्वच्छ, व्यवस्थित र मर्यादित वातावरणमा अन्तिम संस्कार गर्न पाउनु आफैंमा एक महत्वपूर्ण उपलब्धि भएको स्थानीयवासीहरूको भनाइ छ । स्थानीय जनताको भावना र आवश्यकतालाई मध्यनजर गर्दै गच्छे घाटलाई आधुनिक तथा व्यवस्थित बनाइएको सन्धिखर्क नगरपालिकाका नगरप्रमुख कृष्णप्रसाद श्रेष्ठले जानकारी दिनुभयो ।

नगरप्रमुख श्रेष्ठका अनुसार सबदाह गृह लुम्बिनी प्रदेश सरकारको सहयोगमा निर्माण गरिएको हो भने अन्य भौतिक संरचना तथा व्यवस्थापनका कार्यहरू सन्धिखर्क नगरपालिकाको सहयोगमा सम्पन्न गरिएको हो ।

गच्छे घाट आधुनिक र व्यवस्थित बन्दै गएसँगै यस प्रकारको सकारात्मक र उदाहरणीय कार्यको स्थानीयस्तरमा सर्वत्र प्रशंसा गरिएको छ । यस महत्वपूर्ण कार्यमा योगदान पुर्याउने सम्पूर्ण निकाय, जनप्रतिनिधि तथा सहयोगी हातहरूलाई हार्दिक धन्यवाद व्यक्त गरिएको छ ।

सार्वजनिक सम्पत्तिको संरक्षण गरौँ, जिम्मेवारी वहन गरौँ ।