श्याम घिमिरे,
माघ २० अर्घाखाँची –
अर्घाखाँची अस्पतालले सुविधा सम्पन्न नयाँ भवनबाट ल्याब सेवा सुरु गरेको छ । जिल्ला समन्वय समिति अर्घाखाँचीका प्रमुख जीवनारायण कोइरालाले एक कार्यक्रमबीच भवनको औपचारिक शुभारम्भ गर्नुभएको हो । यसअघि साँगुरो कोठाबाट सेवा दिँदै आएको प्रयोगशाला विभाग अब आधुनिक र व्यवस्थित भवनमा सरेसँगै थप अत्याधुनिक ल्याब परीक्षण सेवा सञ्चालनमा ल्याइएको छ । प्रयोगशाला विभाग प्रमुख राजकुमार बन्जाडेका अनुसार नयाँ भवनबाट सेवा सुरु भएपछि परीक्षणको दायरा र गुणस्तर दुवैमा उल्लेखनीय सुधार आएको छ ।

अस्पताल प्रमुख डा. जगन्नाथ तिवारीले ठूला अस्पतालहरूमा प्रयोग हुने प्रविधि र उपकरणहरू प्रयोग गरी विभिन्न प्रकारका ल्याब सेवा सञ्चालनमा ल्याइएको जानकारी दिनुभयो । नयाँ भवनसहितको ल्याब सेवाले जिल्लावासीलाई छिटो, सहज र भरपर्दो स्वास्थ्य सेवा प्रदान गर्ने अपेक्षा गरिएको छ ।