श्याम घिमिरे
अर्घाखाँची २०८२ माघ २३ –

अर्घाखाँची जिल्लामा सञ्चालन हुँदै आएका सार्वजनिक यात्रुवाहक सवारी साधनहरू पछिल्लो समय गम्भीर संकटतर्फ उन्मुख देखिएका छन् । जिल्लाका विभिन्न रुटमा आवश्यकताभन्दा धेरै सवारी साधन सञ्चालन हुँदा अधिकांश गाडीहरू प्रायः खालीजस्तै गुड्न बाध्य छन् । व्यवसायीहरूका अनुसार कतिपय सवारीमा २–४ जना यात्रु मात्रै हुँदा पनि गाडी चलाउनुपर्ने अवस्था सिर्जना भएको छ, जसका कारण इन्धन खर्चसमेत उठाउन मुस्किल भइरहेको छ ।

यस प्रकारको अस्वस्थ प्रतिस्पर्धाले न त यातायात व्यवसायीहरू टिक्न सक्छन्, न त यात्रुहरूले दीर्घकालीन रूपमा सुरक्षित, भरपर्दो र गुणस्तरीय सेवा नै पाउन सक्छन्। यदि समयमै उचित व्यवस्थापन, रुट समायोजन र प्रभावकारी अनुगमन नगरिएमा जिल्लाको सार्वजनिक यातायात क्षेत्र नै गम्भीर संकटमा पर्ने सम्भावना देखिन्छ ।

दीर्घकालीन समाधानका लागि आवश्यक सुझावहरू –

-आवश्यकताको आधारमा सवारी संख्या निर्धारण गरी रुट व्यवस्थापन गर्ने
-यातायात सञ्चालन समितिको सक्रिय भूमिका र नियमित अनुगमन
-व्यवसायीहरूबीच आपसी समझदारी, समन्वय र सहकार्यको विकास
-अस्वस्थ प्रतिस्पर्धा अन्त्य गर्दै पालो प्रणाली वा समय तालिका व्यवस्थापन
-दीर्घकालीन यातायात गुरुयोजना (Transport Master Plan ) निर्माण र कार्यान्वयन

त्यसैले सम्बन्धित यातायात सञ्चालन समिति, स्थानीय तह तथा सरोकारवाला व्यवसायीहरूले आपसी एकता, समन्वय र दीर्घकालीन सोचका साथ यस विषयमा तत्काल ध्यान दिनु अत्यावश्यक देखिन्छ । समयमै सही निर्णय लिन सकिए सार्वजनिक यातायात व्यवसायलाई जोगाउन र यात्रु सेवाको गुणस्तर सुधार गर्न सकिने विश्वास लिइएको छ ।

अर्घाखाँची जिल्लामा झण्डै आधा दर्जन यातायात प्रालिहरूले गाउँका दुरदराज बस्तीहरूसम्म नियमित रूपमा यात्रुवाहक सेवा दिँदै आएका छन् । दुर्गम भूगोल र कठिन परिस्थितिका बाबजुद पनि स्थानीय नागरिकलाई आवागमनमा सहजता पु¥याउँदै यी यातायात सेवाहरू जिल्लाको आर्थिक र सामाजिक जीवनसँग जोडिएका महत्वपूर्ण आधार बनेका छन् ।