श्याम घिमिरे,
फागुन ७ अर्घाखाँची-
लुम्बिनी प्रदेश सरकारका खानेपानी ग्रामीण तथा शहरी विकास मन्त्री चेतनारायण आचार्यले अबको ५ वर्षभित्रमा लुम्विनि प्रदेशका सबै जिल्लामा आवश्यकता र औचित्यको आधारमा सबैको घर–घरमा खानेपानीको धारा जोड्ने बताउनुभएको छ । नेपाल पत्रकार महासंघ अर्घाखाँची शाखाले आईतवार सदरमुकाम सन्धिखर्कमा गरेको सम्मान तथा पत्रकार भेटघाट कार्यक्रममा बोल्दै आचार्यले यस्तो बताउनुभएको हो ।

मन्त्री आचार्यले बढ्दो खानेपानीको माग सम्बन्धमा देखिएका चुनौतीको व्यवस्थापन गर्न सबै क्षेत्रसँग सहकार्य गरेर अगाडी बढ्ने बताउदै अबको ५ वर्षभित्रमा सबैको घर–घरमा खानेपानीको धारा जोड्ने मुख्य उद्देश्यका साथ आफुले मन्त्री पद समालेको बताउनुभयो ।

एमाले केन्द्रीय सदस्य समेत रहनुभएका मन्त्री आचार्यले जिल्लामा थालनी गरेका कामलाई निरन्तरता दिंदै अधुरा रहेका कामहरुलाई क्रमश अगाडि बढाउने दाबि गर्नुभयो । आचार्यले जिल्ला अस्पताल सुधार सहित शिक्षा,सडकको स्तरोन्नती,पर्यटन क्षेत्रको बिकास,रोजगारी सृजना लगायतका कामहरुमा आफुहरु योजना बनाएर लागी परीरहेको भन्दै  बिकास निर्माणमा सबैको सहकार्य हुनुपर्नेमा जोड दिनुभयो ।

कार्यक्रम नेपाल पत्रकार महासंघ अर्घाखाँचीका अध्यक्ष अशोक खनालको अध्यक्षता,सचिब बिनोद गैरेको सञ्चालन र सहसचिब हृदयकुमार भुसालको स्वागत मनतब्यमा सम्पन्न भएको हो ।