के पी भुसाल ‘अजस’

अनौठो कीरा मै परिचित छु सारा जगतमा,
नपोल्ने आफैमा अनल छ जलेको चरणमा,
म उड्दा रातीमा सयल छ आफ्नै तिरिमिरी,
मलाई देख्दैमा सब मनुज भन्छन् जुनकिरी ।

मलाई देख्दैनन् दिनभर कतै मानिस अनि,
कृपाहो भावीको अनुपम छ यो जीवन पनि,
अध्यारो रातीमा सहचर पखेटा फिरफिरी,
अधेरो बेलामा, सुख सयलमा मै जुनकिरी ।

अमाको त्यो कालो,समय सजिलो मैकन सधै,
हुदैनन् त्येस्तोमा ,सहज पथगामी चर कतै,
स सानो प्राणीमा,सबल म छु कीरा फुलसरी,
असाध्ये रातीमा , निडर हिडने मै जुनकिरी ।

सबै प्राणीमा छन् ,विविध थरका अक्षय गुण,
विधाताको मायाँ, सकल चरमा हुन्छ सगुण,
अनाथीको साथी , सहचर बनुँ मै हरघरी,
छु प्यारो रातीको, सख जुनसरी मै जुनकिरी ।

स सानो कीरा मै, अनुपम छु झिल्के जगतमा,
नसोचे है कोही, कचर भनि चुँड्ने फगतमा,
सबैलाइ धर्तीमा,भवभय छ आफ्नै झिलिमिली,
छु आफ्नै औकात् मा,अनुभव लिदै मै जुनकिरी ।।

प्रकाशन मिति : २०८० जेठ १ गते