निम्ब तरु
कोदो चौपाजे लगाएजस्तो लगाइएछ साइनो
फर्काउनेबेला पाथी आउला भन्ठानेको मानो आयो
मान्छे नै रुखो
उस्को भावनाको उपज नै बीउ पनि नर्फकिने खाले छ
आक्रमक थियो शुरुआतको चरणमा
हुन त मेरो क्रोध
भैंसीको जस्तो हो सिङले एकनास किला हानिरहने
हुर्लुक्क आइपुग्छ मुखमा
फेरि पाउर लगाएर निल्नुपर्छ
सम्झनाको घोचेरोमा नचबाइएका थुप्रो सपना
फुटपाथमा अरुले अरु बेच्छन्
मैले आफ्नो हात बेच्न खोजेको छु
तिम्रो पिरती अग्रिम बुकिङ भएको रहेछ
मेरो भाउ छैन ।
खुट्टामा झुन्डिएका छन सपनाका जूकाहरु
घोर जँगलमा थुत्दै फालेपनि साध्य छैन
रिक्तता भर्न झन बिरक्तता थपे झैं
तिमीसँग हिडिएछ
मेरो आफ्नै परिचय छैन्
गाउँसँग जोडिन्छ
म भन्दा प्रिय मृत ईश्वरहरु छन्
जस्तो जीवित छँदा क्राइष्टलाई क्रसमा टाँगिए
आज प्रिय छन
काँडा भएपनि मोहक छ गुलाफ
म त्यसो भइनँ
हुँदा हुँदा अब त बिर्सने कोशिसमा छन
हिजोका बैंसका बासनाहरु
प्रकाशन मिति : २०८० जेठ १०
