के पी भुसाल ‘अजस’
काला मेघ सबै हटेर कणका,आकाश् भयो कन्चन,
धर्तीका सब फूलमा शरद नै,छर्यो सफा चन्दन,
फुल्छन् पुष्पहरू अनेक थरका,उद्यानमा यी दिन,
चल्छन् सौरभ मौसमी पवनमा,कोही कतै छेक्दिन ।

वर्षायाम झरी र गर्जन सहदै भोगेर सास्ती अनि,
बाँचेका सब जीव धारणहरू,रम्छन्असाध्यै पनि,
पीडा ताप सबै हटे प्रकृतिका हट्यो कडा बन्धन ,
प्राणीका मनमा अपार सहजै, छायो खुसी नन्दन ।

औंसीको पनि रातमा गगनका,तारा बने उज्जर,
आए रश्मि रसाइ शशिका,राती भयो सुन्दर,
यस्तो मोहक शुक्लपक्ष महिमा,केगर्नु ब्याख्या बढी,
कस्तो भावुक बन्छ यो मनचरी,टोलाइ हेर्दा घडी ।

आयो पर्व दसैं यसै शरदमा, ल्यायो खुशीका पल,
गन्धा फोहर छैन है शहरमा, बस्ती भए मङ्गल ,
न्यास्रो छैन हटे तनाव नरमा,छैनन् कुनै तल् तल,
मेलापर्व नहो सधै मनुजमा,चिन्ता लखेट्ने बल ।

चिन्ता धेर भएर मानव कतै, दिग्दार खेप्नेभरी,
वैरागी मन ती निशा शरदमा,होलान् चकोरी सरी,
यस्ता गौरव मास ता शरदका, मिल्दैन वर्षैभरी,
आउँछन् घुमदै बिजोग चरका,पीडा सुधार्नेगरि ।।

प्रकाशन मिति : २०८० असोज १६