✍️डिल्ली राज घिमिरे

नयाँ दीप बाल्दै सखासाथ आएँ
पहाडी धरामा स्वयम् मुस्कुराएँ
म कोर्ने छु गम्दै उनै शब्द माला
बुझेको छु यो जिन्दगी पाठशाला ।।

खुसी हुन्छ सम्पन्न देखेर छाती
कुनै छन् बिगार्ने कुनै खास साथी
यही देशभित्रै हटून् मुख्य जाला
बुझेको छु यो जिन्दगी पाठशाला ।।

रची गीत नौलो सुनाई कहानी
बित्यो रात जम्मै रुझाई सिरानी
कठै झोपडीमा लगाएर ताला
बुझेको छु यो जिन्दगी पाठशाला ।।

हजारौँ र लाखौँ बटुल्दै सितारा
नजाती कुभाँती लगाऔँ किनारा
सबैको कलाले बलोस् दिव्य पाला
बुझेको छु यो जिन्दगी पाठशाला ।।

जनादेशभित्रै गरेको प्रहार
यहाँ छन् उनैका चुनावी प्रचार
ठगी गर्छ सारा बजाएर गाला
बुझेको छु यो जिन्दगी पाठशाला ।।

✍️डिल्ली राज घिमिरे
भूमिकास्थान ९ अर्घाखाँची
प्रकाशन मिति : २०८१ कात्तिक १