वसन्त विक्रम जिःसी , वसन्तऋतु
भूमिकास्थान १० अर्घाखाची –

गरी प्रपञ्च दुष्टले अनेक जाल बुन्दछ
धरेर साधु भेष ऊ हजार ताल खेल्दछ
प्रभाव पार्छ तथ्यमा झनै विषाक्त सोचले
घुसेर बन्द कोठरी दुराग्रही स्वभावले ।

कुनै हुँदैन योजना विशाल हुन्छ गर्जन
मिठासपूर्ण शब्दले समाज भाड्छ दुर्जन
विभेदका कुरा गरी समाजको विखण्डन
गर्यो कुरा विकासको झनै थपेर उल्झन
।
न भिन्नता स्वभावमा न भिन्नता विचारमा
भए नि भिन्न रूपमा दुरुस्त छन् कुकर्ममा
छरेर भ्रान्ति राष्ट्रमा युवा उराल्छ भ्रष्टले
युवाहरू सँगै भए छुदैन अस्त्र,शस्त्रले ।

न बोध दण्ड,भेदको न शोक नै छ राष्ट्रको
नितान्त हुन्छ सोचमा सदैव बन्धुवर्गको
हुँदैन शब्दले यहाँ बखान स्वामिभक्तको
भए नी नीति भ्रष्ट ऊ छ साथ अन्धभक्तको ।

भुल्यो सबै परम्परा तथा स्वधर्म संस्कृति
हिसाब छैन पापको कुनै रहेन सत्कृति
थिचोमिचो अशक्तको र चाप्लुसी सशक्तको
लुछाचुँडी र धूर्तता यही त राजनीति हो ।

प्रकाशन मिति : २०८२ असोज ११