श्याम घिमिरे,
फागुन १३ अर्घाखाँची
सन्धिखर्कमा भोली देखि प्रथम प्रकाश महत स्मृति कप खुल्ला क्रिकेट प्रतियोगिता हुने भएको छ । नेपाल खेलकुद महासंघ अर्घाखाँचीका जिल्ला सह–सचिव स्वर्गिय प्रकाश महतको सम्झनामा भोली (फागुन १४ गते) देखि प्रथम प्रकाश महत स्मृति कप खुल्ला क्रिकेट प्रतियोगिता सञ्चालन गर्न लागीएको आयोजकले जनाएको छ ।

सनिवार सन्धिखर्कमा पत्रकार सम्मेलनको आयोजना गरी प्रतियोगिताको सबै तयारी पुरा भएको नेपाल खेलकुद महासंघ अर्घाखाँचीका अध्यक्ष हेनरी बस्नेतले जानकारी दिनुभयो । गत २०७९ साल फागुन ७ गते विराटनगरमा भएको खेलकुद महासंघको कार्यक्रममा सहभागी हुने क्रममा महतको सडक दुर्घटनामा परी ज्यान गएको थियो । अर्घाखाँचीले एक होनहार युवा गुमाईरहँदा उहाँको सम्झनामा स्मृति कप खुल्ला क्रिकेट प्रतियोगिता आयोजना गरीएको अध्यक्ष बस्नेतले बताउनुभयो ।

सन्धिखर्कको टुडिखेलमा सञ्चालन हुने प्रतियोगितामा १३ टिमले सहभागिता जनाउने छन् । प्रतियोगिताको बिजेताले ५० हजार र उपबिजेताले ३० हजार रुपैयाँ नगद सहित शिल्ड,मेडल र प्रमाणपत्र प्राप्त गर्ने अर्घाखाँची क्रिकेट संघका अध्यक्ष ऋषिकेश भट्टराईले जानकारी दिनुभयो । यसका साथै म्यान अफ द म्याच, बेस्ट ब्याट्समेन, बेस्ट बलर, बेस्ट फिल्डर, राईजिङ प्लेयर अफ टुर्नामेन्ट, म्यान अफ द टुर्नामेन्ट लगायतका विधामा पनि खेलाडी पुरस्कृत गरिने भट्टराईले बताउनुभयो ।

डिउस कपी बल अर्थात सिम बलले म्याटमा १५ ओभरको खेलाईने प्रतियोगिता नकआउट चरणमा हुने छ । खेलमा रुपन्देहीबाट मान्यताप्राप्त अम्पायरहरु आउने छन् भने खेलको संयोजन अर्घाखाँची क्रिकेट संघले गर्ने महासंघका अध्यक्ष बस्नेतले बताउनुभयो । खेलका लागी आवश्यक पर्ने प्याड, ग्लब्स, हेलमेट लगायतका सामग्री अर्घाखाँची क्रिकेट संघले उपलब्ध गराउने बताइएको छ । खेलको तालिका समेत सार्वजनिक भईसकेको छ ।

पत्रकार सम्मेलनमा बोल्दै नेकपा एमाले अर्घाखाँचीका उपसचिव शम्भु प्रसाद पोखरेलले प्रत्येक वर्ष स्वः महतको सम्झाना खेलकुद प्रतियोगिता आयोजना गरिने गरि क्रिकेटको सुरुवात गरिएको बताउनुभयो । पोख्रेलले प्रकाशको नाममा अक्षयकोष समेत स्थापना गरिएको बताउनुभयो । कार्यक्रम नेपाल खेलकुद महासंघ अर्घाखाँचीका अध्यक्ष हेनरी बस्नेतको अध्यक्षता र नेपाल खेलकुद महासंघका केन्द्रिय सदस्य बिष्णु परियारको सञ्चालनमा सम्पन्न भएको हो ।

                 प्रथम प्रकाश महत स्मृति कप –२०८० खेल तालिका
१.पहिलो खेल : इलाभेन ब्रदर्श डिभर्ना “बि“ Vs यूएसिसि अर्घा
२.दोस्रो खेल : अर्घाखाँची बुलेटिन क्रिकेट क्लब Vs अर्घाखाँची क्रिकेट एकेडेमी
३.तेस्रो खेल : रोयल लम्चि क्रिकेट क्लब Vs बागमारा सामुदायिक क्लब
४.चौथो खेल : सौजन्य समाज किमडाडा Vs कमल पोखरी युथ क्लब सितगंगा
५.पाँचौ खेल : इलाभेन ब्रदर्श डिभर्ना “ ए“ Vs श्री शान्ति युवा क्लब सितगंगा
६.छैठौं खेल : खान ब्रदर्श Vs मदन भण्डारी स्पोर्ट्स एकेडेमी
७.बाइ : मालारानी ६ युवा समाज