श्याम घिमिरे,
चैत १९ अर्घाखाँची,

साथी बचत तथा ऋण सहकारी संस्था लिमिटेड सन्धिखर्कले भित्तेपात्रो विमोचन तथा शुभकामना आदानप्रदान कार्यक्रम सम्पन्न गरेको छ । संस्थाको कार्यालय चुत्रावेसीमा मंगलवार एक कार्यक्रमको आयोजना गरी ६८ औं राष्ट्रिय सहकारी दिवसको पुर्बसन्ध्यामा २०८२ सालको भित्तेपात्रो सार्वजनिक तथा नयाँ बर्षको शुभकामना आदानप्रदान कार्यक्रम सम्पन्न भएको हो ।

कार्यक्रममा बोल्दै संस्थाका अध्यक्ष प्रकाश भुसालले सहकारीको माध्ययमबाट समृद्धि सम्भव रहेको भन्दै सबैलाई सहकारीमा जोडिन आग्रह गर्नुभयो । भुसालले सहकारीले उद्योग,व्यापार संगै कृषि र पशुपालनको क्षेत्रमा समेत लगानी गरेको बताउनुभयोे ।

सञ्चालक समितिका पदाधिकारी र बिभिन्न उपसमितिका सदस्यहरुको उपस्थिती रहेको कार्यक्रम संस्थाका ऋण लगानी तथा धितो मूल्यांकन उपसमितिका संयोजक डिलाराम भुसालको सञ्चालन र उपाध्यक्ष रुद्र प्रसाद श्रेष्ठको स्वागत मनतव्यमा सम्पन्न भएको हो । कार्यक्रममा सहकारीका जेष्ठ सदस्यत्रय खिमानन्द घिमिरे,केशबराज चुँदाली र पुनाराम आचार्यलाइ सम्मान समेत गरीएको थियो । नेपालमा हरेक बर्ष चैत २० गते राष्ट्रिय सहकारी दिवस मनाईन्छ ।